WhatsApp ਨੇ ਜਨਵਰੀ ‘ਚ ਆਪਣੇ ਪਲੇਟਫਾਰਮ ‘ਤੇ 18.58 ਲੱਖ ਭਾਰਤੀ ਖਾਤਿਆਂ ‘ਤੇ ਪਾਬੰਦੀ ਲਗਾ ਦਿੱਤੀ ਸੀ। ਵਟਸਐਪ ਨੇ ਆਪਣੇ ਯੂਜ਼ਰਸ ਦੀਆਂ ਸ਼ਿਕਾਇਤਾਂ ਤੋਂ ਬਾਅਦ ਇਹ ਕਾਰਵਾਈ ਕੀਤੀ ਹੈ। ਇਹ ਜਾਣਕਾਰੀ ਹਰ ਮਹੀਨੇ ਪ੍ਰਕਾਸ਼ਿਤ ਹੋਣ ਵਾਲੀ ਰਿਪੋਰਟ ਤੋਂ ਸਾਹਮਣੇ ਆਈ ਹੈ। ਇਸ ਦੇ ਅਨੁਸਾਰ, 18.58 ਲੱਖ ਖਾਤਿਆਂ ਵਿੱਚੋਂ ਜ਼ਿਆਦਾਤਰ ‘ਤੇ ਉਨ੍ਹਾਂ ਦੇ ਨੁਕਸਾਨਦੇਹ ਵਿਵਹਾਰ ਦੇ ਆਧਾਰ ‘ਤੇ ਪਾਬੰਦੀ ਲਗਾਈ ਗਈ ਸੀ। ਵਟਸਐਪ ਨੂੰ 495 ਭਾਰਤੀ ਖਾਤਿਆਂ ਬਾਰੇ ਵੀ ਸ਼ਿਕਾਇਤਾਂ ਮਿਲੀਆਂ ਸਨ ਜਿਨ੍ਹਾਂ ਨੇ ਹੋਰ ਖਾਤਿਆਂ ‘ਤੇ ਪਾਬੰਦੀ ਲਗਾਉਣ ਦੀ ਅਪੀਲ ਕੀਤੀ ਸੀ। ਵਟਸਐਪ ਦੀ ਤਰਫੋਂ ਕਾਰਵਾਈ ਕਰਦੇ ਹੋਏ, ਅਜਿਹੇ 24 ਖਾਤਿਆਂ ‘ਤੇ ਵੀ ਪਾਬੰਦੀ ਲਗਾ ਦਿੱਤੀ ਗਈ ਸੀ।
ਰਿਪੋਰਟ ਮੁਤਾਬਕ ਇਹ ਕਾਰਵਾਈ 1 ਜਨਵਰੀ 2022 ਤੋਂ 31 ਜਨਵਰੀ 2022 ਦਰਮਿਆਨ ਇਕ ਮਹੀਨੇ ‘ਚ ਕੀਤੀ ਗਈ। ਖਾਸ ਗੱਲ ਇਹ ਹੈ ਕਿ ਕੰਪਨੀ 10 ਅੰਕਾਂ ਦੇ ਮੋਬਾਈਲ ਨੰਬਰ ਤੋਂ ਪਹਿਲਾਂ +91 ਆਈਐਸਡੀ ਕੋਡ ਰਾਹੀਂ ਭਾਰਤੀ ਖਾਤਿਆਂ ਦੀ ਪਛਾਣ ਕਰਦੀ ਹੈ। ਇਸ ਮੈਸੇਜਿੰਗ ਐਪ ਨੇ ਅਕਤੂਬਰ 2021 ਵਿਚ 20 ਲੱਖ ਤੋਂ ਵੱਧ ਖਾਤਿਆਂ ‘ਤੇ ਵੀ ਪਾਬੰਦੀ ਲਗਾ ਦਿੱਤੀ ਸੀ। ਮੈਟਾ ਦੀ ਮਲਕੀਅਤ ਵਾਲੇ ਵਟਸਐਪ ਨੇ ਉਦੋਂ ਕਿਹਾ ਸੀ ਕਿ ਉਹ ਨਵੇਂ IT ਨਿਯਮਾਂ 2021 ਦੀ ਪਾਲਣਾ ਕਰਦਿਆਂ ਕਾਰਵਾਈ ਕਰ ਰਿਹਾ ਹੈ।
ਇਸ ਤੋਂ ਬਾਅਦ ਨਵੰਬਰ ਚ ਵੀ 17 ਲੱਖ 50 ਹਜ਼ਾਰ ਖਾਤਿਆਂ ਤੇ ਪਾਬੰਦੀ ਲਗਾ ਦਿੱਤੀ ਗਈ ਸੀ। ਦਸੰਬਰ ਵਿੱਚ 20 ਲੱਖ ਤੋਂ ਵੱਧ ਭਾਰਤੀ ਖਾਤਿਆਂ ‘ਤੇ ਕਾਰਵਾਈ ਕੀਤੀ ਗਈ ਸੀ। ਵਟਸਐਪ ਸਮੇਂ-ਸਮੇਂ ‘ਤੇ ਪਲੇਟਫਾਰਮ ਤੋਂ ਅਜਿਹੇ ਅਕਾਊਂਟਸ ਨੂੰ ਹਟਾਉਂਦਾ ਹੈ, ਜਿਨ੍ਹਾਂ ‘ਤੇ ਸ਼ੱਕ ਹੁੰਦਾ ਹੈ। ਵਟਸਐਪ ਉਨ੍ਹਾਂ ਅਕਾਊਂਟਸ ਤੇ ਵਟਸਐਪ ਨੂੰ ਅਕਾਊਂਟਸ ਐਕਸ਼ਨ ਦੇ ਤੌਰ ਤੇ ਦਿਖਾਉਂਦਾ ਹੈ, ਜਿਨ੍ਹਾਂ ਅਕਾਊਂਟਸ ਤੇ ਕਾਰਵਾਈ ਕੀਤੀ ਜਾਂਦੀ ਹੈ। ਕਾਰਵਾਈ ਕਰਨ ਦਾ ਮਤਲਬ ਹੈ ਕਿ ਜਾਂ ਤਾਂ ਉਸ ਖਾਤੇ ‘ਤੇ ਪਾਬੰਦੀ ਲਗਾਈ ਜਾ ਰਹੀ ਹੈ ਜਾਂ ਪਾਬੰਦੀਸ਼ੁਦਾ ਖਾਤੇ ਨੂੰ ਦੁਬਾਰਾ ਬਹਾਲ ਕੀਤਾ ਜਾ ਰਿਹਾ ਹੈ।
ਭਾਰਤ ਵਿੱਚ ਨਵੇਂ ਆਈ.ਟੀ ਨਿਯਮ ਪਿੱਛਲੇ ਸਾਲ ਮਈ ਵਿੱਚ ਲਾਗੂ ਕੀਤੇ ਗਏ ਸਨ। ਇਨ੍ਹਾਂ ਨਿਯਮਾਂ ਮੁਤਾਬਕ 50 ਲੱਖ ਤੋਂ ਜ਼ਿਆਦਾ ਯੂਜ਼ਰਸ ਵਾਲੇ ਡਿਜੀਟਲ ਪਲੇਟਫਾਰਮਸ ਨੂੰ ਹਰ ਮਹੀਨੇ ਕੰਪਲਾਇੰਸ ਰਿਪੋਰਟ ਪਬਲਿਸ਼ ਕਰਨੀ ਹੋਵੇਗੀ। ਇਸ ਰਿਪੋਰਟ ਵਿਚ ਪ੍ਰਾਪਤ ਹੋਈਆਂ ਸ਼ਿਕਾਇਤਾਂ ਅਤੇ ਉਸ ‘ਤੇ ਕੀਤੀ ਗਈ ਕਾਰਵਾਈ ਦਾ ਸਾਰਾ ਵੇਰਵਾ ਦੇਣਾ ਹੋਵੇਗਾ।
ਇਸ ਤੋਂ ਪਹਿਲਾਂ ਵਟਸਐਪ ਨੇ ਜ਼ੋਰ ਦੇ ਕੇ ਕਿਹਾ ਸੀ ਕਿ ਉਸ ਦੇ ਪਲੇਟਫਾਰਮ ‘ਤੇ ਮੈਸੇਜਿੰਗ ਐਂਡ-ਟੂ-ਐਂਡ ਇਨਕ੍ਰਿਪਸ਼ਨ ਸਕਿਓਰਿਟੀ ਦੇ ਨਾਲ ਹੈ ਅਤੇ ਵਟਸਐਪ ਕੋਲ ਕੰਟੈਂਟ ਦੇਖਣ ਦੀ ਸਹੂਲਤ ਨਹੀਂ ਹੈ। ਕਿਸੇ ਵੀ ਖਾਤੇ ਦੇ ਵਿਵਹਾਰ ਨੂੰ ਜਾਣਨ ਲਈ, ਵਟਸਐਪ ਕੋਲ ਉਪਭੋਗਤਾ ਰਿਪੋਰਟਾਂ, ਪ੍ਰੋਫਾਈਲ ਫੋਟੋਆਂ, ਗਰੁੱਪ ਫੋਟੋਆਂ ਅਤੇ ਵੇਰਵਿਆਂ ਤੱਕ ਪਹੁੰਚ ਹੈ। ਇਸ ਤੋਂ ਇਲਾਵਾ, ਕੰਪਨੀ ਆਰਟੀਫਿਸ਼ੀਅਲ ਇੰਟੈਲੀਜੈਂਸ ਟੂਲਜ਼ ਦੀ ਵਰਤੋਂ ਕਰਦੀ ਹੈ ਤਾਂ ਜੋ ਪਲੇਟਫਾਰਮ ਦੀ ਵਰਤੋਂ ਗਲਤ ਕੰਮਾਂ ਵਿੱਚ ਨਾ ਕੀਤੀ ਜਾ ਸਕੇ।
