ਚੰਡੀਗੜ੍ਹ, 28 ਮਈ, ਪ੍ਰਾਈਮ ਏਸ਼ੀਆ ਨਿਊਜ਼ ਬਿਊਰੋ :
ਜੇਕਰ ਤੁਸੀਂ ਵੀ 1 ਜੂਨ ਤੋਂ ਬਾਅਦ ਹਵਾਈ ਸਫ਼ਰ ਕਰਨ ਦੀ ਯੋਜਨਾ ਬਣਾ ਰਹੇ ਹੋ, ਤਾਂ ਇਹ ਖ਼ਬਰ ਤੁਹਾਡੇ ਲਈ ਬਹੁਤ ਮਹੱਤਵਪੂਰਨ ਹੈ। ਦੇਸ਼ ਦੀਆਂ ਦੋ ਵੱਡੀਆਂ ਏਅਰਲਾਈਨਾਂ, ਏਅਰ ਇੰਡੀਆ ਅਤੇ ਇੰਡੀਗੋ, ਨੇ 1 ਜੂਨ 2026 ਤੋਂ ਆਪਣੀਆਂ ਘਰੇਲੂ ਉਡਾਣਾਂ ਵਿੱਚ ਵੱਡੀ ਕਟੌਤੀ ਕਰਨ ਦਾ ਫੈਸਲਾ ਲਿਆ ਹੈ। ਇਹ ਕਟੌਤੀ ਅਗਲੇ 90 ਦਿਨਾਂ (3 ਮਹੀਨਿਆਂ) ਤੱਕ ਲਾਗੂ ਰਹੇਗੀ।
ਕਿਉਂ ਲਿਆ ਗਿਆ ਇਹ ਫੈਸਲਾ ?
ਇਸ ਫੈਸਲੇ ਦਾ ਮੁੱਖ ਕਾਰਨ ਮੱਧ ਪੂਰਬ ਵਿੱਚ ਜਾਰੀ ਤਣਾਅ ਹੈ, ਜਿਸ ਕਾਰਨ ਵਿਸ਼ਵ ਪੱਧਰ ‘ਤੇ ਤੇਲ ਦੀ ਕਿੱਲਤ ਸ਼ੁਰੂ ਹੋ ਗਈ ਹੈ। ਇਸ ਦੇ ਨਤੀਜੇ ਵਜੋਂ ਏਵੀਏਸ਼ਨ ਟਰਬਾਈਨ ਫਿਊਲ (ATF) ਯਾਨੀ ਜੈੱਟ ਫਿਊਲ ਦੀਆਂ ਕੀਮਤਾਂ ਅਸਮਾਨੀ ਪਹੁੰਚ ਗਈਆਂ ਹਨ, ਜਿਸ ਕਾਰਨ ਏਅਰਲਾਈਨਾਂ ਨੂੰ ਆਪਣੇ ਫੇਰੇ ਘਟਾਉਣੇ ਪੈ ਰਹੇ ਹਨ। ਰਿਪੋਰਟਾਂ ਅਨੁਸਾਰ ਏਅਰ ਇੰਡੀਆ ਆਪਣੀਆਂ ਘਰੇਲੂ ਉਡਾਣਾਂ ਵਿੱਚ ਲਗਭਗ 20-22 ਫੀਸਦੀ ਦੀ ਕਟੌਤੀ ਕਰਨ ਜਾ ਰਹੀ ਹੈ। ਦੇਸ਼ ਦੀ ਸਭ ਤੋਂ ਵੱਡੀ ਬਜਟ ਏਅਰਲਾਈਨ ਇੰਡੀਗੋ ਵੀ ਆਪਣੇ ਆਪਰੇਸ਼ਨ 7 ਫੀਸਦੀ ਤੱਕ ਘਟਾ ਰਹੀ ਹੈ।
ਇਨ੍ਹਾਂ ਰੂਟਾਂ ‘ਤੇ ਪਵੇਗਾ ਸਭ ਤੋਂ ਵੱਧ ਅਸਰ :
ਏਅਰਲਾਈਨਾਂ ਨੇ ਕਿਸੇ ਵੀ ਰੂਟ ਨੂੰ ਪੂਰੀ ਤਰ੍ਹਾਂ ਬੰਦ ਨਹੀਂ ਕੀਤਾ ਹੈ, ਪਰ ਉਡਾਣਾਂ ਦੇ ਫੇਰੇ ਘਟਾ ਦਿੱਤੇ ਹਨ। ਇਸ ਦਾ ਸਭ ਤੋਂ ਵੱਧ ਅਸਰ ਦਿੱਲੀ ਅਤੇ ਮੁੰਬਈ ਵਰਗੇ ਵਿਅਸਤ ਹਵਾਈ ਅੱਡਿਆਂ ‘ਤੇ ਪਵੇਗਾ:
ਮੁੰਬਈ ਤੋਂ : ਅਹਿਮਦਾਬਾਦ, ਨਾਗਪੁਰ, ਪਟਨਾ ਅਤੇ ਭੋਪਾਲ ਜਾਣ ਵਾਲੀਆਂ ਉਡਾਣਾਂ ਦੀ ਗਿਣਤੀ ਘਟੇਗੀ।
ਦਿੱਲੀ ਤੋਂ: ਹੈਦਰਾਬਾਦ, ਬੈਂਗਲੁਰੂ ਅਤੇ ਕੋਲਕਾਤਾ ਲਈ ਉਡਾਣਾਂ ਪ੍ਰਭਾਵਿਤ ਹੋਣਗੀਆਂ।
ਟਿਕਟਾਂ ਹੋ ਸਕਦੀਆਂ ਹਨ ਮਹਿੰਗੀਆਂ :
ਮਾਹਰਾਂ ਦਾ ਮੰਨਣਾ ਹੈ ਕਿ ਜੇਕਰ ਆਉਣ ਵਾਲੇ ਦਿਨਾਂ ਵਿੱਚ ਤੇਲ ਦੀਆਂ ਕੀਮਤਾਂ ਘੱਟ ਨਹੀਂ ਹੁੰਦੀਆਂ, ਤਾਂ ਏਅਰਲਾਈਨਾਂ ਟਿਕਟਾਂ ਦੀਆਂ ਕੀਮਤਾਂ ਵਧਾ ਸਕਦੀਆਂ ਹਨ, ਜਿਸ ਦਾ ਸਿੱਧਾ ਬੋਝ ਆਮ ਜਨਤਾ ਦੀ ਜੇਬ ‘ਤੇ ਪਵੇਗਾ। ਫਿਲਹਾਲ, ਏਅਰਲਾਈਨਾਂ ਨੇ 1 ਜੂਨ ਤੋਂ 31 ਅਗਸਤ ਦੇ ਵਿਚਕਾਰ ਰੱਦ ਹੋਣ ਵਾਲੀਆਂ ਉਡਾਣਾਂ ਨੂੰ ਆਪਣੀਆਂ ਵੈੱਬਸਾਈਟਾਂ ਤੋਂ ਹਟਾ ਦਿੱਤਾ ਹੈ ਤਾਂ ਜੋ ਲੋਕ ਉਨ੍ਹਾਂ ਵਿੱਚ ਬੁਕਿੰਗ ਨਾ ਕਰ ਸਕਣ।
ਫਰਵਰੀ ਦੇ ਅਖੀਰ ਵਿੱਚ ਸ਼ੁਰੂ ਹੋਏ ਪੱਛਮੀ ਏਸ਼ੀਆ ਦੇ ਸੰਕਟ ਕਾਰਨ ਏਅਰਲਾਈਨਾਂ ਨੂੰ ਕਈ ਤਰ੍ਹਾਂ ਦੀਆਂ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ, ਜਿਸ ਵਿੱਚ ਮਹਿੰਗਾ ਬਾਲਣ ਅਤੇ ਹਵਾਈ ਖੇਤਰ ਦੀਆਂ ਪਾਬੰਦੀਆਂ ਸ਼ਾਮਲ ਹਨ। ਇਸ ਕਾਰਨ ਉਨ੍ਹਾਂ ਦਾ ਸੰਚਾਲਨ ਖਰਚਾ ਕਾਫੀ ਵੱਧ ਗਿਆ ਹੈ। ਇਨ੍ਹਾਂ ਵਧਦੀਆਂ ਲਾਗਤਾਂ ਕਾਰਨ ਕੰਪਨੀਆਂ ਨੇ ਆਉਣ ਵਾਲੇ ਮਹੀਨਿਆਂ ਲਈ ਆਪਣੇ ਘਰੇਲੂ ਹਵਾਈ ਰੂਟਾਂ ਵਿੱਚ ਬਦਲਾਅ ਅਤੇ ਕਟੌਤੀ ਕਰਨ ਦਾ ਰਾਹ ਚੁਣਿਆ ਹੈ। ਏਅਰ ਇੰਡੀਆ ਹਰ ਹਫ਼ਤੇ ਲਗਭਗ 4,400 ਉਡਾਣਾਂ ਦਾ ਸੰਚਾਲਨ ਕਰਦੀ ਹੈ, ਜਿਨ੍ਹਾਂ ਵਿੱਚੋਂ 3,600 ਘਰੇਲੂ ਅਤੇ 800 ਅੰਤਰਰਾਸ਼ਟਰੀ ਹੁੰਦੀਆਂ ਹਨ। ਹੁਣ 22 ਫੀਸਦੀ ਕਟੌਤੀ ਦੇ ਹਿਸਾਬ ਨਾਲ ਏਅਰ ਇੰਡੀਆ ਦੀਆਂ ਹਫ਼ਤਾਵਾਰੀ ਘਰੇਲੂ ਉਡਾਣਾਂ ਵਿੱਚ 790 ਤੋਂ ਵੱਧ ਸੇਵਾਵਾਂ ਦੀ ਕਮੀ ਆਵੇਗੀ। ਕੰਪਨੀ ਨੇ ਬੁੱਧਵਾਰ ਨੂੰ ਜਾਰੀ ਬਿਆਨ ਵਿੱਚ ਕਿਹਾ ਕਿ ਉਹ ਮੌਜੂਦਾ ਸਥਿਤੀ ‘ਤੇ ਨਜ਼ਰ ਰੱਖ ਰਹੀ ਹੈ ਅਤੇ ਹਾਲਾਤ ਆਮ ਹੋਣ ‘ਤੇ ਇਨ੍ਹਾਂ ਉਡਾਣਾਂ ਨੂੰ ਦੁਬਾਰਾ ਬਹਾਲ ਕਰ ਦਿੱਤਾ ਜਾਵੇਗਾ। ਏਅਰ ਇੰਡੀਆ ਐਕਸਪ੍ਰੈਸ ਹਰ ਹਫ਼ਤੇ ਲਗਪਗ 3,000 ਉਡਾਣਾਂ ਚਲਾਉਂਦੀ ਹੈ, ਜਿਸ ਵਿੱਚੋਂ 2,400 ਘਰੇਲੂ ਹੁੰਦੀਆਂ ਹਨ। 10 ਫੀਸਦੀ ਦੀ ਕਟੌਤੀ ਨਾਲ ਇਸ ਦੀਆਂ ਲਗਪਗ 240 ਉਡਾਣਾਂ ਘੱਟ ਹੋ ਜਾਣਗੀਆਂ।
